Chaand Se Un Ke Chehre Par

چاند سے اُن کے چہرے پر گیسوئے مشک فام دو

ایک انوکھی ہے سحر جس سے بہم ہے شام دو

اُن کی جبین ناز پر زلف سیاہ بکھر گئی

شب کے حسین پردے میں چمکے ماہ تمام دو

دونوں طرف ہیں چہرے پر گیسوئے مشک فام دو

جمع ہے ایک آن میں ضدّین صباح و شام دو

تلوں سے اُن کے ہے بندھی شمس و قمر کی روشنی

یہ ہیں اُنہیں کی تابشیں ہیں یہ اُن کے نام دو

پی کے پلا کے میکشوں تلچھٹ درون جام دو

قطرہ دو قطرہ یوں ہی سہی کچھ تو برائے نام دو

اُن کی امان میں رہیں جن کے کرم سے مل گئے

اُن کے چمن کے پاسباں، حسامؔ اور ہمامؔ دو

یہ دونوں بے خطر رہیں اسلام کی سپر رہیں

‘اداۓ دیں پر رہیں شمشیرِ بے نیام دو

کشتئ زندگی میری اب تو کنارے آ لگی

کہتی ہے تم سے زندگی اب تو مئ دوام دو

میدانِ نعتِ شاہِ دیں اختر ہے پر خطر زمیں

یہ مجلسِ غزل نہیں منہ کو ذرا لگام دو