Nigaah e Mehr Jo Us Mehr Ki Idhar Ho Jaa-e

نگاہِ مہر جو اس مہر کی ادھر ہو جائے

گناہ کے داغ مٹیں دل میرا قمر ہو جائے

جو قلب تیرہ پہ تیری کبھی نظر ہو جائے

تو ایک نور کا بقعہ وہ سر بسر ہو جائے

ہماری کشتِ عمل میں کبھی تو پھل آئے

کبھی تو شجرۂ امید بارور ہو جائے

کبھی تو ایسا ہو یا رب وہ در ہو اور یہ سر

کبھی تو ان کی گلی میں میرا گزر ہو جائے

ہمارے سر ہوں خدایا حبیب کا در ہو

ہماری عمر الہی یوں ہی بسر ہو جائے

جو سچے دل سے کہے کوئی یا رسول اللہ

مصیبتیں بھی ٹلیں ہر مہم بھی سر ہو جائے

مری مصیبتوں کا سلسلہ ابھی کٹ جائے

اشارہ ابروِ خم دار کا اگر ہو جائے

تڑپ رہے ہیں فراقِ حبیب میں عاشق

الٰہی! راہ مدینہ کی بے خطر ہو جائے

تیرے غضب سے ہوں غارت یہ دہر کے شیطان

بنے غلام ہر اک ان میں دربدر ہو جائے

جو آپ چاہیں تو ہیزم کو دم میں سبز کریں

کرم جو آپ کا ہو خلد کا شجر ہو جائے

خدا کے فضل سے ہر خشک و تر پہ قدرت ہے

جو چاہو تر ہو ابھی خشک، خشک ابھی تر ہو جائے

عیاں ہے دبدبہ تیرا سماوات و سواح سے

ہماری کھیتی بھی سوکھی ہے پیارے تر ہو جائے

جو کاسۂ تاج کا لے کر تمہارے در پر آئے

تو بادشاہ حقیقت میں تاجْور ہو جائے

تیرے گداؤں کے پا پوش تاجِ سلطاں ہیں

وہ جس کے سر پہ رکھیں نعل تاجْور ہو جائے

جو آپ ہوں میرے پلّے پہ پھر مجھے کیا ڈر

جِدھر نگاہِ کرم ہو خدا ادھر ہو جائے

جو خواب میں کبھی تشریف لائیں جانِ قمر

تو ان کے نور سے معمور سارا گھر ہو جائے

خدا نے قلبِ حقیقت تمہارے ہاتھ کیا

جو شاخ لڑنے کو دو تیغ اور تبر ہو جائے

جو وقتِ وزن گراں پلّا ہو گناہوں کا

شفاعت آپ کی اس دم مری سپر ہو جائے

اندھیری شب میں کرم سے تمہارے اے سرور

عصا صحابہ کا فانوسِ راہ ہو جائے

خدا نے غیب تمہارے لیے حضور کیا

جو راز دل میں چھپے ہوں، تمہیں خبر ہو جائے

وہ آئیں تیرگی ہو دور میرے گھر بھر کی

شبِ فراق کی یا ربّ، کبھی سحر ہو جائے

حجاب اٹھیں جو مرقد سے ان کے روضے تک

اندھیرا قبر کا مٹ جائے، دو پہر ہو جائے

تیرے حبیب کے دشمن ہیں اور خود تیرے

ہر ایک ان میں کافرِ نار وسقر ہو جائے

کنارِ عاطفتِ حاویہ میں ایک ایک جائے

جو ماں کی گوڈ میں بیٹھے، تو خوش پسر ہو جائے

سرپا آگ کے دریا میں ڈوب جائیں یہ

اگر حمیم کا دریا کمر کمر ہو جائے

چمک اٹھیں میری قسمت کا تارا اے نوری

اگر وہ غیرتِ خورشید میرے گھر ہو جائے