Ye Kis Shahanshah e Waala Ki Aamad Aamad He

یہ کس شہنشاہِ والا کی آمد آمد ہے

یہ کون سے شاہِ بالا کی آمد آمد ہے

یہ آج تارے زمیں کی طرف ہیں کیوں مائل

یہ آستاں سے پیم ہے نور کیوں نازل

یہ آج کیا ہے زمانے نے رنگ بدلا ہے

یہ آج کیا ہے کہ عالم کا ڈھنگ بدلا ہے

یہ آج کاہے کی شادی ہے، عرش کیوں جھوما

لبِ زمیں کو لبِ آستاں نے کیوں چوما

سما وہ ڈوبا ہوا اور ساوا خشک ہوا

خزاں کا دور گیا، موسمِ بہار کا آیا

یہ آج کیا ہے کہ بت اوندھے ہو گئے سارے

یہ آج کیوں ہیں شیاطیں بندھے ہوئے سارے

یہ انبیا و رسل کس کے انتظار میں ہیں

یہ آج لات و ہبل کس سے انکار میں ہے

یہ آج بشریٰ لکم کی صدا کا شور ہے کیوں

یہ مرحبا کی نداؤں میں آج زور ہے کیوں

کہا جواب میں ہاتف نے، لو مبارک ہو

اُٹھو خدا کے حبیب آۓ مژدہ ہو تم کو

وہ آۓ، آنے کی جن کے خبر تھی مدت سے

دعا خلیل کی، عیسیٰ کی جو بشارت تھے

بڑھو ادب سے کرو عَرْض السّلامُ عَلَيْك

و اہْلِ بَیْتِکَ وَ الْآلِ وَ اللَّذِیْنَ لَدَيْک

سلام تم پہ خدا کا اور اس کی رحمت ہو

تحیّت اس کی، ثنا اس کی، اس کی نعمت ہو

درود آپ پہ ہر آن بھیجے ربِّ ودود

اور اس کی برکتوں کا روز آپ پر ہو ورود

سلام آپ پر نازل کرے صلوٰۃ و سلام

بلند ذکر کرے آپ کا ہمیشہ مدام

یہی ہیں جن کو ملائک سلام کرتے ہیں

انہی کی مدح و ثنا صبح و شام کرتے ہیں